Die Antwort auf die Frage nach meiner Lebensgeschichte

Eigentlich hau i gar it komma wella.- - - Weil i hau mi nämlich über mi selber gärgert.- - - Do hau i mi ofach sitza lau ond be wegganga. - - Untwerwegs hau i mi no nomal agrufa aber i war schau weg.

Wo i uf d`Welt komma be, war bei ais nermard darhoim. - - Uf am Disch isch an Zedal glega: d`Milch stoht im Backofa.- - Mei Muttar ond mei Vaddar wared grad uf am Weg ge Kartoffel hola.- - Des Feld ghört zwar it ais, - - aber mir holad aisere Kartoffel elaweil beim Karle uf am Acker. Mei Muttar isch a geborene Bundesbahn.- - Des stoht jedenfalls uf aisere Handticher. Mei Vadder isch jetzt im Gfängnis, wega seines Glauben.- - Er hot nämlich glaubt, die Sparkass ghör ihm. Also i be it elle Kender die mir haud.- - Mit send 20 Gschwister.- - Zeha Buba, Nei Mädle ond an Blendgänger. Mir Bridar hoßat elle Fritz,- - außer Paul, der hoßt Hans. Mein Schweschdar isch saumäßig grauß. - - Wenn dia zwomol nakeit, no isch dia schau am Bürgerhaus. Ond meine andara Schweschdra sind so grausig dünn,- - dass se ellaweil zwo mol ens Zemmar komma mißat, damit mar se überhaupt sieht. One dafo treit ellaweil an Besa bei sich,- damit mar sieht, dass es no ebbar geit wo dünner isch wie sie.- - - Ond die hat jetzt Zwilling, die sehnt sich obacha ähnlich.- - - Sowiso dr Oa. Mir hond elle in oam Zemmar gschlofa, mit Gasmaska. Ond weil mir nau oa Bett ghet haut, war des mit dem Schlafa a wenig schwierig. Also des erscht Kend hot mar sobald es gschlofa hot, wieder ausam Bett gnomma ond ad Wahd gstellt. No isch s`näscht dra komma.- - - I be amol 14 Tag lang stau blieba. Des isch kora Sau ufgfalla. Au mit am Wecka war des so a Sach.- - - A Uhr homar it ghet,- - - aber wenn dr Eimer vohl war, no isch sechse gsei. - - -Wenn mei Vadder aber mol a Bierrais gmachet hot,- - no isch der Eimer zwoa Stond vorganga. Wir waret eine sehr intelligente Familie, des ka i aich saga. Mei Bruder isch auf dr Universität in Heidelberg - - - Der stohd do im Spiritus - - - weil ar zwoa Köpf hot. An anderer isch an Verwandlungskünschtlar - - - jawohl. Der goht mit ama alda Mantel in a Lokal ond kommt mit ama neua raus. Im übriga waret mir elle sehr musikalisch.- Mei Muttar näht uf ara Senger – Nähmasche, - mei Vadder war Pianoträger - ond or vo meina Bridar war Sänger. Er hot ellaweil diafar gsonga ond sengt jetzt seit zwo Johr in Sing – Sing. Mit sechse be i no in d Hilfsschul komma.- - Also wa i dert hät helfa solla, des isch mir bis heut no neit klar. - - - Der Lehrer isch saudomm gsei - ond hot elaweil an haufa vo mir wissa wella - - - aber i hau ihm aber nix verroda. Ond weil i dr Liebling ellar Lehrer war, - - - hau i elle Klassa zwomal bsucht. Omal hot er den oder jenen gfrogat:- - „ Was weißt du von den Römern?“- - - . - „Die send elle daut!“ War d`Antwort. Wo er mi gfrogat hot: „Was weißt du von den Wänden?“- - Da haun i gseit - - „Do keit ellaweil Kalk ra.“- - - Dia Antwort hot em Lehrer gar it gfalla - - ruck zuck hau i dem sei Had em Gsicht gspiart. Hau mir schlechte Zeigniss hoam brocht,- - hau mar`s mit am Ausklopfer griagt.- - Bei gute Leischtunga hot`s an Groscha en d`Sparkass geah. - - - War die voll,- - - hot`s an neia Ausglopfer geah. Oamol hau i an Ufsatz ibar mein Hond gschrieba,- - dem hau i dar Schwanz agschnidda.- - Ibar des war mei Muttar ganz wiadig. - - - Weil jetzt hot se jo gar nemme gseah wenn der sich freit. Noch meira Schulentlasseng be i en a Konsumgeschäft komma.- - Die haut hendar dr Ladatheke so glatt bohnarat ghet,- - dass i des öfteren mit dr Had en die Ladakass keit be.- - Ond weil des meim Chef langsam z`bond wora isch, - - be i freiwillig rausgschmissa wora. Do druf na, be i in a Fotogschäft ganga. - - Aber do hau i mi gar it richtig entwickla kenn,- - weil mi mein Chef dauernd fixiert hot. Dank meira erfolgreicha Ausbildung an der Hilfsschul be i no Lehrer wora. - - Aber konn gwehnlicha Lehrer, sondern Abortleerer. Weil mir mei Tätigkeit no langsam anrüchig wora isch, hau i mi uf Wanderschaft begeba.- - Mei Brudar war Pfadfender.- - Wa der schau elles gfonda hot, - - - ha des haut Andere no gar it verlora. Oamol haut mir an Strick gfonda,- - do isch sogar a Kuh dra ghangat. Des hot ais der Richter gar it abneha wella, dass mir des garit gmerkt hond. - - - Als Finderlohn bekamen wir ein Jahr Kost und Logis. Ond in sellara Zeit hau i no mei Poetische Ader entdeckt. - - Ond hau a Anzahl schöner Gedichte gedichtet. Vo dana will i eich amol zwei vortraga: Das Stinktier!Das Stinktier saß auf einer Bank und stank, es hatte keine eile, es stank aus Langeweile,und als die Sonne war versunken,da hat es immer noch gestunken. Zwei Freunde!

Zwei Knaben machten sich n èn Jokus

Und tranken Most im Keller.Wollten plötzlich auf den Lokus,jedoch der Most war schneller.

Noch am`a Johr be i beima Schmied en Lehr ganga.- - Er hot mar an Hammer en d`Had geah, - - - hot a Stuck Eisa uf da Ambos gleit Ond hot gseit:- - - „Wenn i mit am Kopf nick, no hausch druf.“- - - Er hot nau oamol gnickt!